Rútufarþegum vísað í bakgarðinn til að hægja sér: Fer ekki upp í garð á næstunni nema í stígvélum
Fararstjóri hjá ferðaskrifstofunni Ferðamiðlun vísaði rútufarþegum upp í garðinn við íbúðarhúsið á Skjöldólfsstöðum á Jökuldal til að gera þarfir sínar í kvöld. Heimilisfólkið segist löngu vera komið með upp í kok af slíkri hegðun sem hafi viðgengist árum saman.„Við vorum að horfa á sjónvarpið þegar við heyrðum í fólki fyrir utan. Ég hugsaði með mér hvað er nú í gangi og leit út. Pabbi gerði það sama og hljóp strax út.
Ég kom á eftir honum og þá löbbuðu tveir niður brekkuna eins og þeir höfðu verið á bakvið hús. Ég sá rútu við bensíndæluna og heyrði í pabba ræða við fararstjórann."
Þetta segir Ingunn Snædal sem var heima hjá foreldum sínum í dag. Skjöldólfsstaðir eru fyrsti bærinn á Jökuldal þegar komið er niður af Möðrudalsöræfum á hringveginum. Þar er jafnframt bensínstöð sem margir stoppa við.
„Það gerist á hverju ári að rútur eru stoppaðar og ferðamenn sendir upp í garðinn hjá okkur til að skíta. Ég hef vísað fólki á einkabílum í burtu en þegar rúturnar eru farnar að vísa fólki í garðinn er maður orðinn ansi pirraður. Það er ólíðandi að þurfa að búa við þetta.
Ég hugsaði með mér „nú geri ég eitthvað" og greip iPadinn af borðinu. Í þá mund sá ég fjóra koma í viðbót úr garðinum."
Ingunn tók myndir af rútunni, sem var merkt Hópferðabílum Akureyrar en mun vera í leiguakstri fyrir Ferðamiðlun, og deildi á Facebook ásamt sögunni. Viðbrögðin létu ekki á sér standa því á fyrsta klukkutímanum var myndunum deilt oftar en 100 sinnum.
Mikil umræða hefur verið síðustu misseri um innviði fyrir vaxandi ferðaþjónustu, meðal annars klósettaðstöðu.
„Það eru engar fréttir í okkar huga að fólk sé skítandi út um allt því hér er skitið út um allt á hverju sumri. Þetta er ekki fyrsta ferðaskrifstofan sem við tölum við út af svona atviki."
Atvikið vekur enn meiri furðu þar sem ferðaþjónustan Á hreindýraslóðum, þar sem er veitingasala og salernisaðstaða, er rekin í gamla barnaskólanum um 100 metra í burtu og merkingar hennar sjást vel frá bensíntanknum.
„Ég fer ekki upp í garð á næstunni nema á stígvélum," segir Ingunn að lokum.
Ekki náðist í forsvarsmenn Ferðamiðlunar við vinnslu fréttarinnar.
Mynd: Ingunn Snædal
