Ærslabelgir settir upp á Egilsstöðum og Borgarfirði
Umhverfis- og framkvæmdaráð Múlaþings hefur samþykkt uppsetningu á ærslabelgjum á Egilsstöðum og Borgarfirði eystra.Í umfjöllun um málið á síðasta fundi Umhverfis- og framkvæmdaráðs kom fram að stefna skuli að staðsetningu ærslabelgs innan skilgreinds íþróttasvæðis við Vilhjálmsvöll á Egilsstöðum. Umhverfis- og framkvæmdaráð samþykkir jafnframt að falla frá grenndarkynningu þar sem umrædd framkvæmd er á opnu svæði sem skilgreint er sem íþróttasvæði í aðalskipulagi Fljótsdalshéraðs 2008-2028.
“Ráðið fagnar framtaki umsækjanda við að koma upp ærslabelg á Egilsstöðum og samþykkir að gefa út framkvæmdaleyfi vegna uppsetningu belgsins á umræddum stað. Jafnframt samþykkir umhverfis og framkvæmdaráð að sveitarfélagið muni taka við ærslabelgnum að uppsetningu lokinni og sjá um viðhald og rekstur,” segir í fundargerð.
Hvað Borgarfjörð eystra varðar er fyrirhuguð staðsetning ærslabelgsins einnig innan skilgreinds íþróttasvæðis.
Þar, eins og á Egilsstöðum samþykkir ráðið fyrirliggjandi umsókn um framkvæmdaleyfi og að falla frá grenndarkynningu þar sem umrædd framkvæmd er á opnu svæði sem skilgreint er sem íþróttasvæði í aðalskipulagi Borgarfjarðarhrepps.
Og á sama hátt og á Egilsstöðum fagnar ráðið framtaki umsækjanda við að koma upp ærslabelg á Borgarfirði. Jafnframt samþykkir umhverfis og framkvæmdaráð að sveitarfélagið muni taka við ærslabelgnum að uppsetningu lokinni og sjá um viðhald og rekstur.
