Áfallalaust í umferðinni þrátt fyrir verulega hálku
Þrátt fyrir töluverða rigningu víðast austanlands frá því í morgun og meðfylgjandi asahláku á vegum og stígum hefur allt gengið áfallalaust fyrir sig að sögn lögreglu.
Gul viðvörun hefur verið í gildi á Austurlandi öllu síðan snemma í morgun sökum hratt hækkandi hitastigs og slyddu eða rigninga því samfara. Úrkoma og vindhraði reyndar verið minni en spár gerðu ráð fyrir en asahláka engu að síður á flestum vegum.
Asahláka er á flestum vegum en samkvæmt upplýsingum frá lögreglu hafa engin mál tengd umferðaróhöppum komið inn á borð hingað til. Áfram er gert ráð fyrir rigningu eða slyddu vel fram á síðdegið samkvæmt Veðurstofu Íslands og einnig verður ofankoma nokkur í nótt svo líklegt er að hálka muni aukast enn frekar en þegar er orðið.
Stórhríð hefur verið á Fjarðarheiði nánast í allan dag og mikill krapi á veginum en þar allt einnig gengið slysalaust fyrir sig enn sem komið er. Einu viðvaranir Vegagerðarinnar fyrir fjórðunginn er að hálka sé víðast hvar og krapi farin að myndast á stöku vegum en engar eru fregnir af vegskemmdum eða tjóni vegna vatnavaxta hingað til.
Viðvaranir Veðurstofunnar gilda til klukkan 17 í dag og fólk áfram hvatt til að fara varlega á vegum úti.
