Allir lausir úr einangrun
Enginn er lengur í einangrun eða sóttkví vegna Covid-19 smits á Austurlandi. Aðgerðastjórn almannavarnanefndar Austurlands brýnir íbúa til áframhaldandi árvekni þótt bólusetning gangi vel.Vonast er til að um 400 íbúar hafi fengið bólusetningu í næstu viku. Þeim mun síðan fjölga áfram á næstu vikum og mánuðum.
Aðgerðastjórnin minnir þó á að þótt fólk hafi verið bólusett verði það áfram að huga að smitvörnum. Bólusettir einstaklingar geta enn borið með sér smit í fólk í sínu nærumhverfi, sem ekki hefur verið bólusett, eftir að hafa snert hlut með veirunni á, svo sem kaffikönnur, bensíndælur, afgreiðsluborð og fleira.
„Höfum þetta í huga, höldum okkar ágæta striki og njótum þess að vera til,“ segir í tilkynningu aðgerðastjórnarinnar.
