Annað árið í röð var Áki í Brekku frá Breiðdalsvík aflahæsti handfærabáturinn
Handfærabáturinn Áki í Brekku SU 760, sem útgerðarfyrirtækið Gullrún á Breiðdalsvík gerir út, toppaði aflalista slíkra báta annað árið í röð á liðnu ári þrátt fyrir að gera aðeins út að sumarlagi.
Samkvæmt árslista Aflafrétta 2023 náðust tæp 127 tonn af afla um borð í Áka á síðasta ári eða tæplega 10 tonnum meira en næsti handfærabátur á þeim lista. Þó útgerð Áka sé á Breiðdalsvík gera skipverjar mest út frá Hornafirði hvert sumar og þá sérstaklega á ufsa.
„Það er rétt að við gerum bara út á sumrin og aðallega á ufsann,“ segir Elís Pétur Elísson, eigandi Gullrúnar, aðspurður út í þetta góða gengi.
„Það helgast af því að það er aðgengilegt að komast í kvóta á ufsa og þess vegna gerum við út með fókus á þann fisk. Það munum við aftur gera í sumar. Báturinn er í þessum töluðu nýkominn á Siglufjörð í vélarskipti, því verki ætti að ljúka í byrjun apríl og þá verður tekið á því. En ufsinn er líkast til helsta ástæða þess hve ofarlega við erum á þessum listum. Þeir eru tiltölulega fáir bátarnir sem gera út á ufsann eða færabátar sem gera út á kvóta. Langstærsti hluti þessara báta er að gera út á strandveiðina og þá eru menn almennt að fara mun fleiri ferðir.“
Stefnt á Íslandsmet
Elís segir að skipverjar á Áka hafi fyrir næsta sumar sett sér lítið eitt sérstakt markmið sem sé að setja Íslandsmet í sumar. „Það er í þessu eins og öðru að það skiptir öllu máli að hafa gott, vant fólk um borð sem gjörþekkir miðin og það hefur okkur tekist. Þeir hafa orðað að slá Íslandsmet í sumar en ég veit ekki nákvæmlega hvað þeir sjá fyrir sér í því. Mig grunar að það sé nú erfitt að slá Íslandsmet á færi þessa dagana því á árum áður voru tiltölulega stórir bátar á færaveiðum ólíkt því sem nú gerist. Strákarnir þurfa því að skilgreina nákvæmlega hvers konar Íslandsmet þeir hyggjast bæta.“
Báturinn fengsæli í heimahöfn á Breiðdalsvík. Mynd Goðaborg
