Appelsínugul viðvörun á Austurlandi í dag
Spáð vonskuveðri og Veðurstofa Íslands hefur gefið út appelsínugula viðvörun á Austfjörðum síðdegis í dag og fram til miðnættis. Um suðvestan storm er að ræða allt frá 20 m/s-28 m/s sem er varasamt ferðaveður og fólk er hvatt til að huga að lausamunum.
Djúp lægð gengur nú yfir land allt sem dýpkaði í nótt og því hafa viðvaranir verið gefnar út. „Miðað við spár eins og þær voru fyrst á sunnudag og svo í gærmorgun þá dýpkaði lægðin heldur í nótt og nýjustu spár sem við fengum í nótt voru nógu slæmar til þess að okkur þætti ástæða til að uppfæra viðvaranir upp í appelsínugult núna eftir hádegi og fram á kvöld,“ sagði Elín Björk Jónasdóttir í samtali við RÚV í dag.
Það horfir til betri vegar strax á morgun í veðrinu og spáð er austanátt 5-13 m/s, þurrt síðdegis og 2-8 stiga hiti. Mjög sambærilegu veðri er spáð á föstudag.
