Ásta Jóhanna og Guðmundur fengu verðlaun fyrir garðinn sinn
Það voru hjónin Ásta Jóhanna Einarsdóttir og Guðmundur Bjarnason, Sunnugerði 15 á Reyðarfirði, sem fengu umhverfisverðaun Fjarðabyggðar í ár fyrir garðinn sinn.Greint er frá verðlaununum á vefsíðu Fjarðabyggðar. Þar segir að verðlaunin hafi verið veitt í fjórða sinn í ár,
„Árlega veitir Fjarðabyggð umhverfisviðurkenningu sem er í senn hvatning og viðurkenning til handa þeim sem eru til fyrirmyndar í umgengni á lóðum sínum.,“ segir í umfjöllun á vefsíðunni.
„Í ár er engin undantekning á þessari skemmtilegu venju, þrátt fyrir það ástand sem skapast hefur vegna COVID-19. Þó varð bæði dráttur á afhendingu viðurkenningarinnar, vegna þessa ástands, ásamt því að ekki er unnt að bjóða til sérstaks viðburðar í kringum afhendingu verðlaunanna eins og vanin hefur verið.“
Um mitt sumar óskað Fjarðabyggð eftir ábendingum íbúa um tilnefningar. Hlutskörpust í innsendum tilnefningum og samkvæmt niðurstöðu matsaðila voru hjónin Ásta Jóhanna Einarsdóttir og Guðmundur Bjarnason.
„Þau Ásta og Guðmundur hafa lagt mikla vinnu og natni í garðinn við hús sitt á Reyðarfirði og þar má glöggt sjá að þar fer fólk sem hefur mikin metnað fyrir því að hafa fallega lóð við hús sitt,“ segir ennfremur
Á meðfylgjandi mynd má sjá þau hjónin taka á móti viðurkenningunni sem afhent var af Eydísi Ásbjörnsdóttur, forseta bæjarstjórnar Fjarðabyggðar, og Önnu Berg Samúelsdóttur, umhverfisstjóra.
Fjarðabyggð óskar þeim hjónum innilega til hamingju með viðurkenninguna.
