Atmonia, Síldarvinnslan og Laxar bætast við orkugarðinn
Fyrirtækin Atmonia, Síldarvinnslan og Laxar hafa bæst í hóp þeirra sem undirritað hafa viljayfirlýsingu um aðkomu að grænum orkugarði sem til skoðunar er að byggja á Reyðarfirði.Markmið græna orkugarðsins er að byggja upp vetnisframleiðslu eða rafeldsneyti til að flýta fyrir orkuskipti í sjávarútvegi og flutningum.
Við hana fellur til bæði súrefni og varmi sem fyrirhugað er að nýta nánar. Í tilkynningu frá Landsvirkjun segir að til skoðunar sé að framleiða kolefnislausan áburð eða nota súrefni til landeldis á fiski. Þá verður athugað hvort hægt verði að nýta varmann til húshitunar á Reyðarfirði.
Sterkara samstarf
Fjarðabyggð, Landsvirkjun og Copenhagen Infrastructure Partners hrundu verkefninu af stað fyrr á árinu. Í tilkynningunni er aðkomu nýju fyrirtækjanna þriggja lýst sem mikilvægum áfanga í þeirri vinnu sem nú standi yfir við þróun og greinginum á tækifærum orkugarðsins. Þá standi yfir viðræður við fleiri fyrirtæki sem lýst hafi áhuga á að koma að verkefninu.
„Landsvirkjun er í stöðugri leit að leiðum til að mæta áskorunum vegna loftslagsbreytinga, bæði hér heima og á alþjóðavísu. Grænn orkugarður á Reyðarfirði getur skapað bæði verðmæti og þekkingu samhliða því að ýta undir orkuskipti, bætta orkunýtingu og minni losun kolefnis. Samstarfið við CIP og framlag Fjarðabyggðar, Atmonia, Síldarvinnslunnar og Laxa getur hjálpað okkur að ná þessum markmiðum,“ segir Ríkarður Ríkarðsson, framkvæmdastjóri Viðskiptaþróunar og nýsköpunar hjá Landsvirkjun.
Spennandi áskorun
„Við leggjum áherslu á sjálfbæra nýtingu sjávarauðlindarinnar, þar sem leitast er við að nota nýjustu tækni sem völ er á til veiða og vinnslu. Við erum sífellt að leita leiða til að minnka kolefnisfótspor okkar, meðal annars með því að skipta út jarðefnaeldsneyti fyrir sjálfbærari orkugjafa. Þetta verkefni mun gera orkuskipti fýsilegri og verður vonandi til þess að framtíðin verði grænni en ella,“ segir Gunnþór Ingvason, forstjóri Síldarvinnslunnar í Neskaupstað.
„Sjálfbærni og ábyrgð eru meðal kjarnagilda okkar og við erum því hæstánægð að taka þátt í mótun á grænum orkugarði. Að nýta verðmætar hliðarafurðir eins og súrefni og nota þær til að skapa enn frekari verðmæti verður spennandi áskorun fyrir okkur og samstarfsfyrirtæki okkar,“ segir Jens Garðar Helgason, framkvæmdastjóri Laxa sem er með umfangsmikið sjókvíaeldi í Reyðarfirði.
„Við erum sannfærð um að grænn orkugarður á Reyðarfirði getur orðið miðstöð verðmæta- og þekkingarsköpunar sem gagnast mun samfélaginu til lengri tíma og hjálpa til í baráttunni gegn loftslagsbreytingum. Það er líka mjög spennandi að hugsa til þess möguleika að Reyðarfjörður muni loksins geta fengið hitaveitu vegna þess starfs sem hér mun fara fram,“ segir Jón Björn Hákonarson, bæjarstjóri Fjarðabyggðar.
Þróa nýja tækni við framleiðslu ammoníaks
Austfirðingar þekkja Atmonia sennilega síður en það er frumkvöðlafyrirtæki sem þróar nýja tækni við framleiðslu ammoníaks úr lofti og vatni. Tæknin losar engar gróðurhúsalofttegundir en núverandi framleiðsla ammoníaks er ábyrg fyrir 1-2% af losun koltvísýring af mannavöldum. Þá er Atmonia einnig að þróa umhverfisvænni aðferð við að framleiða nítrat úr ammoníaki.
„Meginmarkmið Atmonia er að draga verulega úr losun gróðurhúsalofttegunda með nýrri tækni á sviði ammoníaks- og nítrat framleiðslu og passar þátttaka í Græna Orkugarðinum fullkomlega inn í þá vegferð. Er tækni fyrirtækisins bæði hagkvæm og umhverfisvæn nýjung og erum við mjög spennt yfir því að Reyðarfjörður verði með fyrstu stöðunum þar sem okkar tækni verður beitt í baráttunni gegn hlýnun jarðar,“ segir Guðbjörg Rist, framkvæmdastjóri fyrirtækisins.
Verkefni sem skiptir sköpum
Hið danska Copenhagen Infrastructure Partners P/S (CIP) er sjóðafyrirtæki sem sérhæfir sig í fjármögnun orkuinnviða eins og vindorku á láði og legi, sólarorku og framleiðslu orku úr lífmassa og úrgangi. Eins hefur fyrirtækið fjárfest í raforkudreifingu, orkugeymslu og öðrum orkuinnviðum. CIP rekur átta sjóði, með um 16 milljarða evra í stýringu frá um 100 alþjóðlegum stofnanafjárfestum í Evrópu, Asíu, Ástralíu og Norður-Ameríku auk fjölþjóðlegra stofnana eins og Fjárfestingarbanka Evrópusambandsins, EIB.
„Verkefni eins og þetta á Reyðarfirði skiptir sköpum fyrir ríki og atvinnugreinar sem vilja taka næsta stóra skrefið til að draga úr kolefnislosun og ná markmiðum Parísarsamkomulagsins. Markmið okkar með verkefninu á Reyðarfirði er að greiða fyrir grænum orkuskiptum á Íslandi og í Norður-Evrópu og bæta orkunýtingu með því að nýta kosti hringrásarhagkerfisins.
Það er mikilvægt fyrir okkur að vinna með jafn öflugum aðila og Landsvirkjun og starfa með leiðandi fyrirtækjum í sjávarútvegi, fiskeldi, vöruflutningum og nýsköpun á Íslandi við að leysa úr læðingi þau tækifæri sem felast í grænu rafeldsneyti, grænum áburði og verðmætasköpun úr hliðarafurðum rafeldsneytis-framleiðslunnar,“ segir Felix Pahl, einn meðeiganda CIP.
Aftari röð: Karsten Uhd Plauborg, Felix Pahl og Anna-Lena Jeppsson frá CIP og Ríkarður Ríkarðsson frá Landsvirkjun. Í fremri röð: Hörður Arnarson frá Landsvirkjun, Jón B. Hákonarson frá Fjarðabyggð, Kristín Linda Árnadóttir frá Landsvirkjun, Jón Már Jónsson frá Síldarvinnslunni og Guðbjörg Rist frá Atmonia. Mynd: Landsvirkjun
