Bílabíó RIFF á Egilsstöðum í kvöld
Bíóbíll kvikmyndahátíðarinnar RIFF er þessa stundina á leið til Egilsstaða. Þar verður í kvöld slegið upp bílabíó og sýnd kvikmyndin Dancer in the Dark.Á dagskrá bíóbílsins eru barnastuttmyndir af dagskrá hátíðarinnar, stuttmyndir tilnefndar til evrópsku kvikmyndaverðlaunanna EFA og Dancer in the Dark, kvikmynd Lars von Trier með Björk Guðmundsdóttur í aðalhlutverki.
Bíllinn er væntanlegur í Egilsstaði seinni partinn í dag og verður á bílaplaninu við Menntaskólann á Egilsstöðum. Byrjað á stuttmynda- eða barnasýningu um klukkan 17:00. Bíllinn mun fara um bæinn og hringja bjöllu áður en sýning hefst en hvað í boði verður ræðst af hverjir mæta.
Kvikmyndin um Myrkradansarann verður sýnd klukkan 21:00. Aðgangur er ókeypis. Hún verður einnig sýnd á Eskifirði við húsnæði Laxa á sama tíma annað kvöld.
Á morgun verða síðan sýningar fyrir skólabörn á Egilsstöðum og Reyðarfirði áður en bíllinn fer áfram til Hafnar í Hornafirði.
