Bræðslan fer fram á morgun
Magni Ásgeirsson, einn skipuleggjandi tónlistarhátíðarinnar Bræðslunnar sem fram fer á Borgarfirði eystri um helgina, segir lítið annað að gera en að halda sínu striki.
Um kvöldmatarleytið í kvöld tilkynnti ríkisstjórnin um hertar aðgerðir innanlands sem taka í gildi á miðnætti á morgun. Þar sem meðal annars er kveðið á um að ekki megi fleiri en 200 koma saman.
Í kvöld fer fram svokallaður föstudagsforleikur Bræðslunnar og á morgun er Bræðslan sjálf.
„Það eru allir komnir á hátíðina og lítið annað að gera en að halda sínu striki. Þessi ákvörðun hefði þurft að koma fyrr til að blása hátíðina af. Fólki er í sjálfsvald sett hvað það gerir úr þessu. Við munum reyna að passa allt eins vel og við getum, það verða spritt og grímur á svæðinu og svo þarf fólk auðvitað að passa sínar persónulegu sóttvarnir,“ segir Magni Ásgeirsson.