Eiður Ragnars ráðinn fulltrúi sveitarstjóra á Djúpavogi
Eiður Ragnarsson hefur verið ráðinn fulltrúi sveitarstjóra á Djúpavogi. Um er að ræða 40% starf með fastri viðveru á mánudögum á skrifstofu Múlaþings á Djúpavogi.Greint er frá þessu á vefsíðu Múlaþings. Þar segir að fulltrúi sveitarstjóra er staðgengill sveitarstjóra og hefur umsjón með daglegum rekstri sveitarfélagsins á staðnum, í samráði við sveitarstjóra og yfirmenn viðkomandi sviða.
Meðal verkefna eru að sitja og undirbúa fundi heimastjórnar á Djúpavogi, sjá um ritun fundargerða og passa að afgreiðslur heimastjórnar komist í réttan farveg.
„Eiður er boðinn velkominn til starfa hjá Múlaþingi,“ segir á vefsíðunni.
Þær upplýsingar fengust hjá Múlaþingi að ráðningin væri tímabundin til loka tímabilsins. Við slíkar kringumstæður þarf ekki að auglýsa stöður.