Ekkert skólahald á Reyðarfirði næstu þrjá daga
Grunnskóli Reyðarfjarðar og Leikskólinn Lyngholt verða lokaðir mánudag, þriðjudag og miðvikudag á meðan verið er að ná utan um útbreiðslu Covid-19 smits á Reyðarfirði.Þetta kemur fram í tilkynningu frá aðgerðastjórn almannavarna á Austurlandi. Staðan verður endurmetin á miðvikudag þegar niðurstöður úr seinni skimun, sem verður á þriðjudag, liggja fyrir.
Í gær var búið að staðfesta 16 smit í tengslum við skólana. Þau smit eru sögð dreifast víða um skólana og erfiðlega hafi gengið að rekja þau enda snerting þeirra víða.
Fjörutíu sýni voru tekin í bænum í gær. Niðurstaða úr þeim verður kynnt þegar hún liggur fyrir sem vonast er til að verði síðar í dag. Boðið er upp á sýnatöku þar í dag frá 12-13. Þeir sem hafa einhver einkenni eða telja sig hafa verið í samskiptum við smitaðan aðila eru hvattir til að mæta.
Smitrakningarteymi hefur sent frá sér upplýsingar um rétt viðbrögð til þeirra sem eru í sóttkví eða hafa á annan hátt verið útsett fyrir smiti, um það hvaða reglur gilda. Viðbúið er að fleiri bætist í þann hóp á næstunni, en þar eru um 200 manns. Á www.covid.is má finna frekari upplýsingar um reglur sem gilda um sóttkví og einangrun.
„Við erum að sigla í gegnum svolítið öldurót þessa stundin en sjáum til lands. Það mun þó reyna á okkur næstu daga - gætum því öll fyllstu varúðar og höldum áfram að feta okkur saman að lokatakmarkinu,“ segir í tilkynningunni.