Engin útköll í rokinu
Engin útköll munu hafa borist austfirskum björgunarsveitum þrátt fyrir talsvert hvassviðri sem gengið hefur yfir Austurland síðasta sólarhring.Mestur vindstyrkur á láglendi mældist í Hamarsfirði, 47 m/s um klukkan níu í gærkvöldi. Á Vatnsskarði eystra hefur vindur verið stöðugur í yfir 20 m/s frá hádegi í gær.
Veginum yfir Fjarðarheiði var lokað um hádegi í gær en opnaður í morgun. Öxi og Breiðdalsheiði eru enn lokaðar auk þess sem varað er við vindhviðum í Hamarsfirði. Leiðinda færi var á leiðinni yfir Möðrudalsöræfi þegar líða tók á gærdaginn en þau eru nú opin.
Vindurinn á að ganga niður á næstu tímum. Veðurstofan bendir þó á að von sé á hvassvirði og snörpum vindhviðum á heiðum fram yfir hádegi.
Mynd úr safni.
