Farið í tiltekt og lagfæringar á Stöðvarfirði á morgun
Fréttir • This email address is being protected from spambots. You need JavaScript enabled to view it. • Fyrst birt 06. feb 2025 20:54 • Uppfært 06. feb 2025 20:55
Starfsmenn þjónustumiðstöðvar Fjarðabyggðar og Fjarðabyggðarhafna fara í fyrramálið á Stöðvarfjörð til að aðstoða við tiltekt og lagfæringar til bráðabirgða eftir ofsaveðrið í dag.
Flest sem fokið gat á Stöðvarfirði gerði það í dag. Meira en tugur húsa er skemmdur. Ekki var nóg með að vindur svipti þakplötum af heldur hellirigndi í kjölfarið og hafa því líka einhverjar skemmdir orðið vegna vatns.
Víða í bænum er brak sem hefur fokið og brýnt að fjarlægja það þannig það valdi ekki frekari skaða. Þá urðu skemmdir í höfninni, landgangur féll niður og fleira sem þarf að laga.
Jón Björn Hákonarson, forseti bæjarstjórnar Fjarðabyggðar, segir að farið verði af stað í fyrramálið og geti íbúar látið vita ef þeir þurfa aðstoð. Hann segir mikið foktjón á staðnum.
Íbúar eru hvattir til að hafa samband við tryggingafélög sín en Náttúruhamfaratrygging Íslands veitir takmarkaða vernd þar sem um foktjón er að ræða.
Hættustigi almannavarna var aflétt á Austfjörðum á níunda tímanum í kvöld.
Mynd: Aðsend
