Foreldrar hvattir til að fylgjast með fréttum yfir helgina

Formlega eiga verkföllin að hefjast á miðnætti en áhrifin birtast ekki fyrr á mánudag. Ríkissáttasemjari lagði í gær fram innanhússtillögu sem deiluaðilar hafa frest fram til klukkan 13 á morgun að svara. Hófleg bjartsýni virðist um árangurinn.

Á Lyngholti er hluti starfsfólks í Félagi leikskólakennara þannig ekki fara allir starfsmenn í verkfall. Þórður Vilberg Guðmundsson, sviðsstjóri mannauðs- og umbótasviðs Fjarðabyggðar, segir að búið sé að gera ákveðnar ráðstafanir en ekki sé fyllilega ljóst hversu víðtækar lokanir verði. Enn sé vonast til að deiluaðilar nái saman.

Fjarðabyggð sendi í gær frá sér tilkynningu þar því var beint til foreldra að fylgjast með fréttum og tilkynningum um framhaldið á heimasíðum Lyngholts og Fjarðabyggðar. Sömu tilmæli eru til foreldra í Egilsstaðaskóla.

Þar nær verkfallið til grunnskólakennara, deildarstjóra og náms- og starfsráðgjafa. Skólastjóri, aðstoðarskólastjóri, stuðningsfulltrúar, skólaliðar og starfsfólk sem ekki kennir fara ekki í verkfall. Þess vegna verður frístund áfram opin á venjulegum tíma og hægt að óska eftir þjónustu sérfræðinga sem ekki eru í Kennarasambandinu. Tónlistarkennarar verða heldur ekki í verkfalli þannig nemendur geta mætt í tónlistartíma. Þess utan er nemendum óheilt að mæta í skólann.

Verkfallið í Lyngholti er ótímabundið. Í Egilsstaðaskóla hefur verið boðað til tímabundins verkfall, sem stendur út nær allan febrúar.