Framsókn með langmesta fylgið í NA-kjördæmi
MMR hefur birt niðurstöður skoðunarkönnunar sem gerð var dagana 8.-14. júlí og sýnir fylgi flokkana eftir kjördæmum.
Athygli vekur hve gríðarlegt fylgi Framsóknarflokkurinn er með í kjördæminu en hann mælist með um 30% fylgi samanborið við 12,9% á landsvísu.
Minnsta fylgi Sjálfstæðisflokksins á landinu er í NA-kjördæmi og mælist flokkurinn með um 15% fylgi samanborið við tæplega 25% á landsvísu.
Sósíalistaflokkur Íslands mælist hvergi betur en í NA-kjördæmi þar sem fylgi hans er tæplega 10% og fylgi hans í kjördæminu meira en hjá: Viðreisn, Flokki fólksins, Miðflokknum og Pírötum.
Fylgi Samfylkingarinnar, Miðflokksins, Flokks fólksins og Vinstri grænna í kjördæminu er nokkuð svipað og fylgi flokkana á landsvísu. Vinstri græn með rétt rúmlega 10% en Samfylkingin með um 15% sem er fáeinum prósentustigum meira en á landsvísu. Miðflokkurinn í kjördæminu er að sama skapi með aðeins meira fylgi í NA-kjördæmi en á landsvísu og mælist með um 7%. Flokkur fólksins mælist með rúmlega 6%.
Fylgi Viðreisnar og Pírata í kjördæminu er afar lítið og mælist Viðreisn vart í kjördæminu sem þykja tíðindi þar sem flokkurinn er með um 10% fylgi á landsvísu. Þá mælast Píratar hvergi verr en í NA-kjördæmi og nær flokkurinn ekki 5% í kjördæminu samkvæmt könnuninni.
