Fundu víkingaöxi á Stöð í Stöðvarfirði
Fundist hefur öxi við fornleifauppgröftinn á landnámsskálanum að Stöð í Stöðvarfirði. Bjarni F. Einarsson fornleifafræðingur sem stjórnar uppgreftrinum segir að um dæmigerða járnöxi sé að ræða frá víkingaöld."Öxin fannst í gólfi skálans og það er líklegt að þetta sé í fyrsta sinn sem öxi finnst í landnámsskála hérlendis," segir Bjarni. "Axir sem þessar hafa yfirleitt fundist sem lausamunir eða í gömlum kumlum hingað til."
Aðspurður um aldur axarinnar segir Bjarni að aldurinn á gólfinu sem hún fannst í sé vel rannsakaður og mældur og er frá því rétt fyrir árið 900. Í Landnámu segir að þessum tíma hafi Þórhaddur hinn gamli búið á Stöð.
"Þetta er mjög áhugaverður fundur og skemmtilegur," segir Bjarni. "Einkum þar sem líklega er um að ræða fyrsta fund af þessu tagi í landnámsskála.
Fornleifauppgröftur hefur staðið yfir um árabil að Stöð í Stöðvarfirði. Þar hafa meðal annars fundist skífur, snældusnúðar og skutull. Verkið fékk styrk úr fornminjasjóði upp á 4,5 miljónir kr. í apríl s.l. Var það hæsti styrkurinn sem sjóðurinn veitti í ár.
Mynd: Öxin sem um ræðir./Facebook.