Fyrirkomulag á niðurgreiðslu flugfargjalda innanlands kynnt í dag
Sigurður Ingi Jóhannsson, samgöngu og sveitarstjórnarráðherra, hefur boðað til blaðamannafundar í flugstöðinni á Egilsstöðum eftir hádegi. Tilefni fundarins er fyrirkomulag niðurgreiðslu á flugfargjöldum.Niðurgreiðslan er ætluð til að létta undir með íbúum á landsbyggðinni til að sækja þjónustu sem er staðsett á höfuðborgarsvæðinu. Rétt á henni eiga íbúar í ákveðinni fjarlægð frá Reykjavík en búast má við að í dag skýrist nánar hver skilyrðin eru fyrir nýtingu. Þá mun einnig koma í ljós hversu mikil niðurgreiðslan verður á hvern fluglegg.
Niðurgreiðslan var í raun staðfest með samþykkt samgönguáætlunar í sumar og fjárlaga í lok síðasta árs. Hún er eitt af stefnumálum ráðherra og var hluti af stjórnarsáttmála ríkisstjórnarinnar.
Gert er ráð fyrir að í ár muni hver íbúi, sem rétt á til niðurgreiðslu, geta nýtt sér eina ferð fram og til baka frá Reykjavík en þær verði þrjár framvegis. Niðurgreiðslan nær aðeins til ferða í einkaerindum.
Dæmi eru um sambærilegar niðurgreiðslur víða í Evrópu en fyrirmyndin er einkum sótt til Skotlands. Hún hefur því gengið undir heitinu „skoska leiðin“ en nýtt nafn verður kynnt í dag.
Fundurinn hefst klukkan 13:00. Hægt verður að fylgjast með honum í beinni útsendingu á Facebook-síðu ráðuneytisins.
