Fyrsta skóflustungan að nýjum leikskóla
Fyrsta skóflustungan að nýjum leikskóla í Fellabæ var tekin í dag. Stefnt er að því að skólinn verði tekinn í notkun haustið 2022.Það voru þau Guðmunda Vala Jónasdóttir, leikskólastjóri í Fellabæ, Stefán Vignisson framkvæmdastjóri MVA og Björn Ingimarsson, bæjarstjóri, sem tóku fyrstu skóflustunguna ásamt hópi leikskólabarna.
Stórvirkari vinnuvélar mæta á svæðið eftir helgi. MVA er aðalverktaki verksins en Mannvit hefur eftirlit með því.
Leikskólinn verður alls 890 fermetrar. Gert er ráð fyrir að hann verði tilbúinn að innan 15. júlí á næsta ári og verklok eru áætluð mánuði síðar. Þrjár deildir verða á skólanum og pláss fyrir um sextíu börn.
Kostnaður er áætlaður 650 milljónir króna. Í samtali við Austurfrétt sagði Björn að það værri í hærri mörkum kostnaðaráætlunar. Þetta hefði þó orðið niðurstaðan eftir rýni og endurskoðun.
Í ávarpi sínu sagði hann að framkvæmdin hefði verið nokkur ár í undirbúningi. Skoðaðar hefðu verið nokkrar mismunandi staðsetningar en niðurstaðan orðið að hafa skólann rétt utan við grunnskólann.
„Þetta verkefni er liður í að þróa samfélagið okkar áfram á jákvæðan hátt og því ber að fagna. Ég er sannfærður um að þessi skóli verður prýði í okkar ágæta sveitarfélagi.“
