Gámur fauk á Borgarfirði
Fréttir • This email address is being protected from spambots. You need JavaScript enabled to view it. • Fyrst birt 24. des 2024 12:10 • Uppfært 24. des 2024 12:12
Gámur sem hýsir búnað hjólaleigu á tjaldsvæðinu á Borgarfirði eystra fauk á hliðina í hvassviðri í nótt. Yfir 40 metra hviður mældust þar.
„Það komu mjög miklir byljir hér í nótt en þetta stóð ekki lengi. Við erum með mæli hérna í þorpinu sem sýndi 42 m/s í hviðum,“ segir Björn Aðalsteinsson, íbúi á Borgarfirði.
Auk gámsins fuku til bílakerrur og kör, sem er ekki óvanalegt í hvassviðri. Björn segir að vindurinn hafi staðið að vestsuðvestan en misjafnt er milli staða í Bakkagerðisþorpi hvar strengir myndast í mismunandi vindáttum.
Ekki hafa enn borist fréttir af foktjóni annars staðar á Austurlandi en tvær gular viðvaranir voru í gildi í gær vegna hvassviðris. Mesti vindur á landinu það sem af er degi var á Fjarðarheiði klukkan 1:30 í nótt, þar mældist rúmlega 41 m/s í hviðu. Engin útköll eru skráð hjá lögreglunni vegna veðurs.
Mynd: Björn Aðalsteinsson
