Gerlamengun í neysluvatni Hallormsstaðar vegna bilunar
Heilbrigðiseftirlit Austurlands (HAUST) tók í gær sýni úr neysluvatni íbúa í Hallormsstað en þar varð vart gerlamengunar í síðustu viku. Ljóst verður síðar í vikunni hvort tekist hafi að komast fyrir frekari mengun.
Reyndist um bilun í gegnumlýsingartæki að ræða en starfsfólk HEF-veitna greip skjótt til aðgerða þegar kólígerlamengun var staðfest og var skipt um gegnumlýsingartækið á föstudaginn var.
Þrátt fyrir það þurfti að bíða sýnatöku frá HAUST sem var framkvæmd í gær að því er fram kemur á vef HEF-veitna. Jafnan tekur þrjá til fjóra daga áður en þær niðurstöður liggja fyrir og á meðan er íbúum enn ráðlagt að sjóða allt sitt neysluvatn. Annars konar vatnsnotkun er hins vegar í lagi án sérstakra aðgerða.
Var þetta í annað skipti á skömmum tíma sem vart verður mengunar í neysluvatni staðarins en í lok ágúst þurfti einnig að grípa til aðgerða þegar óhreinindi fundust í vatnsbólinu.
Staðará við vatnsból Hallormsstaðar. Saur frá fólki eða blóðheitum dýrum komst í vatnsbirgðirnar í liðinni viku og gegnumlýsingarbúnaður virkaði ekki sem skyldi. Mynd HEF
