Hægt að kjósa hvar sem er innan kjördæmis á kjördag
Ekki er skylda fyrir kjósanda að kjósa í sinni heimadeild á kjördag. Hann getur mætt á hvaða kjörstað sem er innan síns kjördæmis.„Þessi heimild hefur verið til staðar lengi en það eru ekki margir sem hafa nýtt sér þetta. Þó hefur verið nokkuð um þetta hér í Fjarðabyggð, við erum með marga kjörstaði og mikið af fólki sem fer á milli.
Þetta hafa því verið 20-30 atkvæði í hverjum kosningum,“ segir Gísli M. Auðbergsson, formaður kjörstjórnar í Fjarðabyggð.
Fyrirkomulagið virkar í grófum dráttum þannig að kjósandi, sem til dæmis býr á Egilsstöðum, mætir á kjörstað á Eskifirði eða jafnvel Akureyri. Hann segir starfsmönnum þar hvar hann býr og skrifar undir eyðublað þar sem hann afsalar sér réttinum til að kjósa í sinni heimakjördeild, gegn því að fá að kjósa þar sem hann er.
Yfirlýsingin er vottuð af kjörstjórn á staðnum og send á kjörstjórn í heimakjördeildinni sem vottar að kjósandinn hafi ekki fyrr um daginn kosið í sinni heimabyggð. Þegar sú staðfesting liggur fyrir fær kjósandinn atkvæðisseðil sem hann fyllir út og skilar í kjörkassa þar sem hann er. Þetta er þó háð því að sú kjörfundur í heimadeild kjósandans standi enn yfir.
Þeir fyrirhyggjusömustu geta verið búnir að hafa samband við sína kjörstjórn og biðja um að vera færðir í aðra kjördeild, en að sögn Gísla er það afar sjaldgæft.
Þessi heimild er virk, þótt kjósandi hafi kosið utankjörfundar, enda er það svo að kjósandi getur alltaf kosið á kjörfundi þótt hann hafi greitt atkvæði utankjörfundar. Þegar kjörfundi lýkur eru utankjörfundaratkvæði yfirfarin og atkvæði kjósanda, sem mætt hefur á kjörstað, eytt.
Gísli kveðst sjá fyrir sér að þetta verði auðveldara í framtíðinni með rafrænni kjörskrá, en heimild um hana er að finna í nýjum kosningalögum sem taka gildi um næstu áramót.