Hægt að panta sýnatöku í gegnum Heilsuveru
Austfirðingar, með einkenni Covid-19 smits, geta nú pantað tíma í sýnatöku í gegnum vefinn Heilsuvera.is. Um leið og tími hefur verið pantaður er viðkomandi einstaklingur sjálfkrafa kominn í sóttkví.Á meðan beðið er eftir sýnatökunni og niðurstöðum þeirra þarf viðkomandi því að halda sig fjarri öðrum. Að jafnaði tekur allt að sólarhring að fá þær.
Tveir einstaklingar eru sem fyrr í einangrun vegna smits á Austurlandi og þrír í sóttkví. Aðgerðastjórn almannavarna á Austurlandi vekur athygli á að þótt fjöldi smita á höfuðborgarsvæðinu sé heldur í rénum er enn mikið um smit utan þess, meðal annars í nágrannafjórðungum sem veldur áhyggjum.
Þannig greindust 13 ný smit á Norðurlandi eystra í gær og á Akureyri eru meira en 80 manns í einangrun.
Aðgerðastjórn hvetur því Austfirðinga til að fara varlega og ferðast ekki nema af brýnni nauðsyn.
