Hefur komið í 43 sundlaugar á landinu
„Ég hef ekki náð að heimsækja allar sundlaugar á Austurlandi en það er framtíðarstefna að ná því markmiði,“ segir Arnbjörg Kristín Konráðsdóttir listakona og jógakennari sem nú sýnir í Tankinum á Djúpavogi. Stendur sýningin, Molda, út júní.Á Facebook síðu Arnbjargar kemur fram að hún hefur heimsótt 43 sundlaugar á landinu og vill helst ná að heimsækja þær allar.
„Það verður að vísu að fylgja með að ég kenni meðal annars svokallað hafjóga og sú kennsla fer yfirleitt fram í sundlaugum,“ segir Arnbjörg. „En allar sundlaugar hafa sinn sjarma.“
Arnbjörg segir að hún sé ekki ókunn á Djúpavogi og það sé alltaf skemmtilegt að koma þangað.
„Ég hef unnið áður í Tankinum meðal annars við hljóðupptökur,“ segir Arnbjörg. „Ég vildi nýta mér hljóminn sem er til staðar í salnum.“Umræddar upptökur voru á gong en það er hljóðfæri sem Arnbjörg hefur tekið ástfóstri við og spilaði raunar á við innsetningu Moldu um síðustu mánaðamót. Hún hefur einnig stofnað gong setur á Akureyri.
Um verkið sjálft segir m.a. í frétt á austurfrett.is að það sé unnið úr náttúrulegum íslenskum efnum sem féllu til á vordögum og þurrkuðum lótusfræhylkjum erlendis frá ásamt íslenskum bergkristal frá Steinasafni Auðuns.
Þá segir að í verkinu sé að finna rekavið úr hlöðuvegg í Eyjafirði sem upprunalega sé kominn frá Síberíu. Auk trjáróta frá Djúpavogi og Eyjafirði í vor.
Arnbjörg er fædd og uppalin í Skagarfirði og síðar Akureyri. „Ég hef alltaf búið fyrir norðan fyrir utan áratug er ég bjó í borginni í tengslum við vinnu mína sem jógakennari,“ segir Arnbjörg.
Hún var raunar stödd í Reykjavík er við náðum tali af henni við að útskrifa nemendur úr jógaskóla sínum. Sjálfur skólinn er hins vegar til heimilis á Akureyri.
„Þetta nám sem við vorum að útskrifa úr var unnið í samvinnu við jógakennara í Kanada. Hann er raunar staddur á Vancouver eyju,“ segir Arnbjörg.
Fram kemur í máli Arnbjargar að hún hafi lært til jógakennara bæði hér heima og erlendis. Stöðugt sé hægt að bæta við vitneskju sína á þessu sviði enda margar tegundir og útfærslur til af jóga og hvernig hægt er að nota það til hugleiðslu og slökunar.
„Ég er raunar á leið í nám aftur í sumar,“ segir Arnbjörg. Hún mun þó koma aftur til Djúpavogs í lok júní til að taka niður sýningu sína. Og kannski skella sér í sund í nágrenninu í leiðinni.
Mynd: Arnbjörg Kristín kemur aftur á Djúpavog í lok mánaðarins. Mynd: Facebook.
