Hildur: Þakklát fyrir þrjá fulltrúa
Hildur Þórisdóttir, oddviti Austurlistans, segist þakklát fyrir að hafa fengið þrjá fulltrúa kjörna í fyrstu kosningunum í nýju, sameinuðu sveitarfélagi á Austurlandi. Hún vonar að kosningarnar boði góða tíma í nýja sveitarfélaginu.„Ég er mjög þakklát fyrir þrjá fulltrú þótt ég hafi verið búinn að gefa það út að markmiðið væru fjórir.
Kjördagurinn var dásamlegur. Það var yndislegt veður, allir glaðir, vel mætt í kosningakaffi hjá okkur og svo rættist úr kjörsókninni,“ sagði Hildur í samtali við Austurfrétt eftir að úrslit lágu fyrir.
Austurlistinn var eina framboðið sem ekki naut stuðnings einhvers stjórnmálaflokkanna á landsvísu og bendir Hildur á að árangurinn sé athygliverður í ljósi þess. „Við fengum hvorki fjármagn né aðstoð þingmanna eða ráðherra – þótt það sé alltaf gott að fá það fólk hingað,“ segir hún.
Listinn fékk næst flest atkvæði 27% en Sjálfstæðiflokkurinn fékk 29% og 4 fulltrúa. Ellefu fulltrúar eru i nýrri sveitarstjórn. Hildur segir ekkert farið af stað um myndum meirihluta.
„Mér finnst rökrétt að þeir sem fengu flest atkvæði hafi samband við þá sem fengu næst flest. Það munaði ekki miklu en við skulum sjá hvað helgin ber í skauti sér.“
