Húshitun kostar mest á Austfjörðum
Hæsti húshitunarkostnaður á landinu er á Reyðarfirði, Vopnafirði og í Neskaupstað eða um 191 þúsund kr. á ári. Í þessum hóp eru einnig Grundarfjörður, Hólmavík og Vík í Mýrdal. Þessi kostnaður er nær þrefaldur á við lægsta kostnaðinn á landinu sem er á bilinu 60 til 70 þúsund kr.Þetta kemur fram í nýrri úttekt sem Orkustofnun hefur gert fyrir Byggðastofnun . Þar sem kostnaðurinn er hæstur er um beina rafkyndingu að ræða en hitaveitu hjá þeim sem eru með lægsta kostnaðinn en það eru Flúðir, Seltjarnarnes og Brautarholt á Skeiðum.
Í úttektinni kemur fram að verð fyrir beina rafhitun hefur lækkað um 15% frá árinu 2014. Á Seyðisfirði þar sem um kynta hitaveitu er að ræða er kostnaðurinn nú 179 þúsund kr. en hefur lækkað um 18,7% frá 2014.
Á Eskifirði er hitaveita frá Hitaveitu Fjarðabyggðar og þar kostar húshitun 152 þúsund kr. og hefur hækkað um 0,8%. Lægsti húshitunarkostnaður á Austurlandi er á Egilsstöðum hjá hitaveitu Egilsstaða og Fella eða 101 þúsund kr. Hann hefur hækkað um 1,4% síða 2014.
Fram kemur m.a. að kostnaðurinn á Egilsstöðum er á pari við höfuðborgarsvæðið þar sem hann er að jafnaði 106 þúsund kr.