Kærkomnar fréttir sem ber að fagna
Yfir 90% landsmanna ætla að ferðast innanlands í sumar. Þar af ætlar tæplega helmingur að nýta sér hótelgistingu. Þetta kemur fram í könnun Gallup sem gerð var í síðasta mánuði.“Þetta eru mjög kærkomnar fréttir og þeim ber að fagna,” segir Þráinn Lárusson eigandi 701 hotels. “Það er mín skoðun að Íslendingar muni nýta sér ferðamöguleika innanlands í meiri mæli á komandi árum en áður hefur þekkst.”
Þráinn segir að ferðasumarið mikla í fyrra innanlands hafi sýnt landsmönnum að þjónusta og veitingar á landsbyggðinni eru ekkert síðri en á höfuðborgarsvæðinu.
“Þá kemur einnig til að núna er hægt að bóka hótelgistingu á hagkvæmum kjörum allavega í júlí,” segir Þráinn. “Það er ekki mikið af erlendum ferðamönnum sem kemur hingað austur í júlí en fjöldi þeirra eykst í ágúst.”
Fjallað er um könnunina á vefsíðu Ferðamálastofu Þar segir að flestir landsmenn ætla í sumarbústaðaferð eða þrír af hverjum fimm. Þar á eftir koma heimsóknir til vina og ættingja (44%), borgar- og bæjarferð(ir) (44%), ferð(ir) með vinahópi eða klúbbfélögum (36%) og útivistarferð(ir) (32%).
Tæplega helmingur landsmanna ætlar að nýta sér hótelgistingu á ferðalögum innanlands í sumar. Þeim mun hærri sem fjölskyldutekjurnar eru því líklegra er fólk að nýta sér hótelgistingu. Yngsti aldurshópurinn virðist ekki ætla að nýta hótelgistingu í sama mæli og þeir sem eldri eru.
Um tveir af hverjum fimm ætla að gista hjá vinum og ættingjum eða í sumarhúsi í einkaeign og um þriðjungur ætlar að gista á skipulögðu tjaldsvæði eða í orlofshúsi félagsamtaka. Aðra tegund gistingar ætla landsmenn að nýta í minna mæli.
Einnig kemur fram að áform um innanlandsferðir hafa lítið breyst frá sambærilegri könnun sem gerð var fyrr á árinu þ.e. í janúar og febrúar.
