Kjarnafæði skyldað til að selja eign sína í Sláturfélagi Vopnfirðinga
Samkeppniseftirlitið hefur heimilað samruna Norðlenska, Kjarnafæðis og SAH afurða með skilyrðum. Meðal þeirra er að sameinað félag selji eign sína í Sláturfélagi Vopnfirðinga.Kjarnafæði og Norðlenska hafa um nokkurn tíma átt í viðræðum um sameiningu en samningar tókust loks á síðasta ári með fyrirvara um samþykki Samkeppniseftirlitsins, sem liggur nú fyrir.
Fyrirtækin sem sameinast hafa sterk tengsl við Austurland, fjölmargir bændur á svæðinu eru meðal þeirra tæplega 500 sem eiga hlut í Norðlenska í gegnum móðurfélag þess, Búsæld og slátra gripum sínum þar.
Þá hefur Kjarnafæði átt um þriðjungs hlut í Sláturfélagi Vopnfirðinga. Samkeppniseftirlitið setur þau skilyrði að sameinað félag selji þann hlut sinn til bænda eða félaga í meirihlutaeigu bænda. Tímafrestur er til að ganga frá henni en ekki gefið upp hve langur.
Í ársreikningi Sláturfélags Vopnafjarðar fyrir árið 2019 kemur fram að Kjarnafæði hafi keypt um 80-90% afurða félagsins og þau hafi verið á markaðslegum forsendum. Þá hafa SAH afurðir einnig keypt af Vopnfirðingum.
Í skilyrðunum segir að sameinað félag sé skuldbundið til að eiga áfram í viðskiptum við Sláturfélagið í tiltekinn tíma. Þetta sé til að tryggja áframhaldandi rekstur þess og tilveru, gefa því tíma til að bregðast við breytingum þannig félögin geti starfað sem sjálfstæðir keppinautar.