Krefjast úrbóta á veitingastaðnum Glóð
Þrátt fyrir að hafa verið starfræktur um tæplega átta ára skeið hafa forráðamenn veitingahússins Glóðar í Valaskjálf enn ekki sett upp fullnægjandi hreinsunarbúnað frá eldhúsi staðarins. Lokafrestur til þess rann þó út í byrjun árs 2018.
Heilbrigðiseftirlit Austurlands, HAUST, gerir alvarlegar athugasemdir við að enn komist fituefni frá eldhúsi staðarins beint ofan í lagnakerfi bæjarins með fráveituvatni. Kostnaðarsamar stíflur vegna þessa verða reglulega auk þess sem mikill óþrifnaður hlýst af fituefnum í fráveitukerfinu.
Í svari frá eigendum Glóðar kemur fram að að starfmenn þess séu meðvitaðir um að ekki megi losa fitu í niðurföll auk þess sem aðeins ómettuð fita sé notuð á veitingastaðnum. Slík fita storkni ekki í lögnum.
HAUST féllst ekki á þau mótrök enda sé mettuð fita í mörgum algengum dýraafurðum og krefst þess að fullnægjandi fituskilju verði komið fyrir. Hafa forsvarsmenn frest fram í mars til úrbóta.