Létt hreyfing í náttúrunni getur losað um streituna
Brynhildur Arthúrsdóttir frá Syðri-Vík í Vopnafirði, stendur um næstu helgi fyrir námskeiðinu Konur í kærleika á heimaslóðum sínum. Hún segir létta hreyfingu í náttúrunni geta losað um spennu sem herjar á mannfólkið í daglegu lífi.Brynhildur stendur fyrir námskeiðinu ásamt Helgu Birgisdóttur, eða Geggu. Gegga er hjúkrunarfræðingur, meðferðaraðili og myndlistarkona en Brynhildur er félagsráðgjafi og starfar við velferðarmál hjá Reykjavíkurborg.
Þær hafa lengi verið vinkonur en hugmyndin að námskeiðinu kviknaði í samtali þeirra þegar Brynhildur lýsti töfrum náttúrunnar við að vinda ofan af streitu. Gegga stóð fyrir sambærilegu námskeiði um Hólaskjóli í fyrrasumar þar sem Brynhildur var meðal þátttakenda.
„Þar upplifði ég hvað aðferðir Geggu gagnast vel við að losa um streitu og spennu og hindranir hugans sem draga gjarnan úr okkur í daglegu lífi.
Létt hreyfing í friðsælli náttúru spilaði stórt hlutverk í þessari andlegu uppbyggingu. Við tókum því höndum saman um að halda námskeið með svipuðu formi í Syðri-Vík. Þar átti ég mín æsku- og uppvaxtarár og kem reglulega til að endurnærast og njóta náttúrunnar.“
Í Syðri-Vík er sauðfjárbú og ferðaþjónusta með gistingu fyrir hópa þannig aðstaða fyrir námskeiðið er góð. Þar er stutt í sjóinn með klettum, fjöru og fuglalífi.
Brynhildur bætir við að hafi alla tíð hvílt sig á erli borgarinnar nokkrum sinnum á ári með að fara austur í sveitina til að fylla sig lífsorku. „Sveitalífið, fólkið mitt, kyrrðin og straumarnir frá náttúrunni næra minn innri kjarna, gefa mér orku og móta vitund mína,“
Báðar hafa hafa um árabil stutt við fólk í leit að bættri andlegri líðan, en Gegga er frumkvöðull SMILER, hefur starfað sem meðferðar- og markþjálfi og skrifað kafla í erlendar bækur.
Dagskrá helgarinnar er fjölbreytt með léttum gönguferðum, hugleiðslu, fyrirlestrum, orkuæfingum auk heilsufæðis.
„Þátttakendur tengjast sjálfum sér betur, njóta friðar, kærleika og stuðnings í hópefli kvenna og með sjálfri sér. Námskeiðið opnar dyr að nýju lífi og er sannkölluð vítamínsprauta fyrir hamingjuna. Konurnar fara svo heim með gagnleg verkfæri og lausnir sem leiða til betra lífs,“ segir í Brynhildur.
