Metafköst í frystihúsi LVF á Fáskrúðsfirði
Í frystihúsi Loðnuvinnslunnar (LVF) á Fáskrúðsfirði hefur lífið gengið umfram sinn vanagang, ef þannig er hægt að komast að orði um góðan árangur. Á dögunum var slegið met í afköstum frystihússins þegar 230 tonn af fiski voru unnin á 42 klukkustundum. Hafa aldrei jafn mörg tonn farið í gegn um vinnsluna á jafn skömmum tíma.Þetta kemur fram á vefsíðu Loðnuvinnslunnar en þar er vitnað í Þorra Magnússon framleiðslustjóra sem er sáttur með árangurinn og segir þetta afar ánægjulegt og ekki síst vegna þess að innan þessara 42 klukkustunda hefði verið 4-5 klukkustunda bilun í vélbúnaði.
Þorri segir einnig að fyrst og fremst væri þetta starfsfólkinu að þakka. “Hér er hörkumannskapur,” segir hann og ítrekaði það aftur:
“í fyrsta lagi hörku mannskapur, síðan bættur búnaður og gott hráefni er grundvöllurinn að þessu góða gengi,” bætir hann við.
Á vefsíðunni segir að aflinn sem unnin er í frystihúsinu kemur af Ljósafelli, Sandfelli og Hafrafelli, auk þess sem að keyptur hefur verið afli af Sigurði Ólafssyni SF á Höfn. Segir Þorri að jafnan þyrfti að kaupa hráefni á fiskmarkaði til viðbótar við það hráefni sem fley LVF koma með að landi, slík er orðin framleiðslugeta frystihússins.
Sífelldar endurbætur eru í gangi í frystihúsinu, aukin tækni og búnaður sem gerir það að verkum að aukning í framleiðni er stöðug.
“Ég hef þá sýn að ekki séu ýkja mörg ár í að við tökum 10 þúsund tonn af bolfiski í gegn um húsið, það eru bara nokkur misseri í það” segir Þorri þegar hann er inntur eftir framtíðarsýn.
Þegar vel gengur og afköst eru mikil skilar það sér líka í launum starfsmanna, bónusinn ríkur upp og fólkið sem vinnur verkin fær aukin laun, svo ekki sé nú minnst á kökuna sem boðið var upp á í tilefni árangursins. Gott er að launa gott með góðu, að því er segir á vefsíðunni.
Mynd: Kakan sem boðið var upp á./lvf.is
