Hugsanleg rýming húsa undir Botnabrún á Seyðisfirði eftir helgina
Ef veðurspá gengur eftir er von á töluverðri rigningu á Austfjörðum aðfararnótt mánudags og fram á miðvikudag. Hugsanlega þarf að grípa til rýmingar húsa á Seyðisfirði vegna þessa að mati lögreglu.
Samkvæmt nýjustu veðurspám mega Austfirðingar eiga von á verulegri rigningu strax aðfararnótt mánudags og rignt gæti linnulítið alveg fram á miðvikudag ef spár ganga eftir. Af þeim sökum hefur Lögreglustjórinn á Austurlandi gefið út viðvörun þess efnis að hugsanlega þarf að koma til rýmingar húsa undir Botnabrún á Seyðisfirði og þá sérstaklega húsum í nágrenni við stóra skriðusárið.
Lokaákvörðun um hugsanlega rýmingu verður tekin um miðjan dag á sunnudaginn kemur og íbúar hvattir til að fylgjast grannt með veðurspá sem og fréttatilkynningum um helgina. Ennfremur ítrekar lögregla að aðgæslu ber að hafa sé fólk á ferð meðfram Búðará og á öðrum þeim stöðum þar sem varnargarðar beina hugsanlegum skriðustraumum.