„Okkur finnst þörf á að ræða geðheilbrigðismál“
Á morgun, föstudag, verður opið geðheilbrigðisþing í Valaskjálf á Egilsstöðum undir yfirskriftinni Batnandi fólki er best að lifa: Samtal um geðheilbrigði. Það eru Rauði krossinn á Héraði- og Borgarfirði eystra, HSA, félagsþjónusta Fljótsdalshéraðs og Hugarafl sem standa að þinginu.
Dagskráin hefst klukkan níu með erindinu „Hver er staðan á geðheilbrigðismálum á Austurlandi“ og eftir það rekur hver fyrirlesturinn annan, allt til klukkan 16:00. Þingið er öllum opið. Ragnhildur Rós Indriðdadóttir er formaður Rauða krossins á Héraði og Borgarfirði.
„Þetta er skipulagt núna sem sérstakur viðburður, ég veit að svona þing og geðheilbrigðisdagar hafa verið haldnir hér á Austurlandi á síðustu árum, oft í kringum Alþjóðalega geðheilbrigðisdaginn sem var í gær, 10.10. Þingið er því ekkert rökrétt framhald af einu eða neinu ef svo má að orðið komast, einungis sprottið upp af því að okkur finnst þörf á að ræða geðheilbrigðismál. Ef marka má rannsóknir og kannanir virðist sem þeim fari fjölgandi sem eru að kljást við hina ýmsu geðkvilla og þetta á við um flesta aldurshópa. Þessi mál eru mikið til umræðu í samfélaginu almennt þessi missirin, hvernig þjónusta á sviði geðheilsu eigi að vera, hvaðan ætti að veita hana, hver og hvernig,“ segir Ragnhildur Rós.
Bati verður í brennidepli
Yfirskrift málþingsins er „Batnandi fólki er best að lifa" og segir Ragnhildur Rós að „bati“ sé það sem kastljósinu verði beint að í ár. „Hugmyndafræði Hugarafls snýst um valdeflingu, hvernig megi efla einstaklinginn til að finna styrk sinn og vinna með hann og flestir fyrirlesarar verða með innlegg á þeim nótunum.“
„Ég veit að það er margt í deiglunni“
Hvar erum við stödd í geðheilbrigðismálum á Austurlandi í dag? „Það er ekki gott að segja, kannski komumst við að því á morgun. Ég veit að það er margt í deiglunni. HSA er til dæmis að auka þjónustuna á þessu svið ef ég skil rétt, hér á Héraði er mann- og geðræktarstöðin Ásheimar þar sem fer fram eflandi starf, Austurlandsleiðin svokallaða hefur verið tekin upp á starfssvæði Félagsþjónustu Fljótsdalshéraðs, en þar er stefnt að því að grípa sem fyrst inn í vanda barna og hjálpa þeim og fjölskyldum þeirra.“
Andlegt hjartahnoð
Ragnhildur Rós vill svo einnig benda á að um helgina verður Hugaraflsfólk með tveggja daga námskeið í Ásheimum á Egilsstöðum sem heitir Andlegt hjartahnoð. „Þar er leiðbeint um hvernig má aðstoða fólk sem líður illa andlega, hefur lent í áfalli eða þvíumlíkt. Þar er valdeflingin í fyrirrúmi, í raun getum vill öll hjálpað og aðstoðað meðbræður okkar og systur en ekki verra að fá smá undirstöðu á svona námskeiði. Enn eru fáein pláss laus og má skrá sig á netfangið kristinehjaegilsstadir.is“
