Pósthús eystra opin á morgun
Pósthús á Austurlandi verða opin á morgun, laugardaginn 5. desember þar sem póstur hefur ekki borist inn á svæðið vegna ófærðar síðustu daga.Póstbíll fór úr Reykjavík seinni partinn í dag og er væntanlegur austur í nótt, en bílar komust hvorki austur í gær né fyrr í dag vegna óveðurs og ófærðar.
Þess vegna verða sjö pósthús á Austurlandi opin á morgun. Á Egilsstöðum, Reyðarfirði, Höfn og í Neskaupstað verður opið frá 10-14 en á Eskifirði, Fáskrúðsfirði og Djúpavogi frá 11-15.
Þá segir í tilkynningu frá Póstinum að keyrt verði út á stærri stöðum á landinu um helgina þar sem heimkeyrsla er í boði.
„Eins og staðan er núna er veðrið ekki að spila með okkur en við leggjum allt kapp á að koma sendingum áfram á áfangastaði sem allra fyrst. Það er allra hagur að sendingar komist til viðtakanda við fyrsta tækifæri.
En á sama tíma verðum við að sjálfsögðu að huga að öryggi starfsmanna og við förum ekki af stað nema aðstæður séu öruggar. Við stefnum á að fara í kvöld þannig að allt ætti að vera komið í eðlilegt horf eftir helgi,” er haft eftir Herði Jónssyni, framkvæmdastjóra rekstrarsviðs.