Ríkisstjórnarfundur hafinn á Egilsstöðum
Fundur ríkisstjórnar Íslands í Valaskjálf á Egilsstöðum hófst laust eftir klukkan fjögur í dag. Aðeins eitt mál er á dagskrá, væntanlegar takmarkanir innanlands vegna útbreiðslu Covid-veirunnar.Bæði fundurinn, sem og fundarstaðurinn, var ákveðinn með skömmum fyrirvara. Hentugast þótti að vera eystra þar sem fjöldi ráðherra ríkisstjórnarinnar var staddur í fríi.
Meðal annars kom Katrín Jakobsdóttir, forsætisráðherra, keyrandi á fundinn frá Langanesi. Svandís Svavarsdóttir heilbrigðisráðherra hafði verið í fríi á Austurlandi, Bjarni Benediktsson fjármálaráðherra var í Vopnafirði.
Þá var Sigurður Ingi Jóhannsson á leið til Vopnafjarðar, en hann kom með leiguflugvél ríkisstjórnarinnar. Með fluginu komu einnig Áslaug Arna Sigurbjörnsdóttir og Þórdís Kolbrún Gylfadóttir Reykfjörð. Kristján Þór Júlíusson var heima hjá sér á Akureyri og keyrði austur en Guðlaugur Þór Þórðarson kom af Suðurlandi.
Þrír ráðherrar boðuðu forföll: Lilja Alfreðsdóttir, mennta- og menningamálaráðherra, Ásmundur Einar Daðason, félags- og barnamálaráðherra og Guðmundur Ingi Guðbrandsson, umhverfis- og auðlindaráðherra.
Búist er við að fundurinn standi í um tvo tíma. Fyrir fundinum liggur minnisblað sóttvarnalækænis. Að honum loknum verður tilkynnt um nýjar takmarkanir innanlands en þær voru allar numdar úr gildi fyrir mánuði.