Samkeppnisyfirlitið grípur ekki inn í kaup Síldarvinnslunnar á Vísi
Samkeppniseftirlitið telur ekki ástæðu til íhlutunar vegna kaupa Síldarvinnslunnar á Vísi í Grindavík sem tilkynnt var um í sumar þar sem hún hafi ekki teljandi áhrif á stöðu í íslenskum sjávarútvegi. Eftirlitið telur hins vegar ástæðu til að skoða hvort eigna- og stjórnunartengsl í íslenskum sjávarútvegi, þar með talið tengsl Síldarvinnslunnar við Samherja, séu meiri en áður hafi verið skýrt frá.Þetta kemur fram í úrskurði eftirlitsins sem birtur var í gær. Við athugun sína kannaði Samkeppniseftirlitið hvort umsvif Síldarvinnslunnar annars vegar, hins vegar Síldarvinnslunnar og hennar stærstu eigenda, færu yfir viðmið um það sem eðlilegt gæti talist á samkeppnismarkaði.
Samsteypa Síldarvinnslunnar, sem einnig inniheldur Berg-Huginn í Vestmannaeyjum og Runólf Hallfreðsson á Akranesi auk Vísis, er með 14% heildaraflamarks. Til samanburðar er nefnt að Brim eigi um 13%. Þegar Samherji og Gjögur bætast við Síldarvinnslusamsteypuna hækkar hlutfallið í 24,6%. Það breytir því ekki að hlutfallið er undir þeim viðmiðum sem stuðst er við í evrópskum samkeppnisrétti.
En þótt verði veruleg samþjöppun með aflaheimildum þannig að samkeppni raskist með kaupunum á Vísi þá telur Samkeppniseftirlitið engu síður ástæðu til að skoða tengsl í íslenskum sjávarútvegi.
Eftir kaupin á Vísi mun Samherji eiga 30% í Síldarvinnslunni og Gjögur/Kjálkanes 16%. Eign þeirra hefur þó minnkað eftir að Síldarvinnslan var skráð á almennan hlutabréfamarkað í fyrra sem og með kaupunum nú, sem að hluta er greitt fyrir með hlutafé í Síldarvinnslunni.
Samkeppniseftirlitið tekur fram að rannsóknir þess hafi leitt í ljós talsverð stjórnunar-, eigna- og viðskiptatengsl milli Síldarvinnslunnar, Samherja og Gjögurs/Kjálkaness sem feli í sér vísbendingar um að stofnast hafi til yfirráða í Síldarvinnslunni umfram það sem áður hafi verið greint frá í tilkynningum um samruna. Þetta hafi meðal annars orðið til þess að í byrjun október ákvað eftirlitið að hefja sjálfstæða athugun á stjórnunar- og eignatengslum í sjávarútvegi.
Eftirlitið bendir einnig á vandamál sem fylgi því að yfirráð séu ekki skilgreind eins í samkeppnislögum og lögum um fiskveiðistjórnun. Þannig sé það sjálfstætt álit Fiskistofu að kanna hvort sá kvóti sem kominn sé í hendur Síldarvinnslunnar og tengdra aðila fari yfir þau mörk.
Fram kemur að Samkeppniseftirlitið og Fiskistofa hafi þegar fundað vegna þessara mála og lýsir eftirlitið sig reiðubúið til að aðstoða Fiskistofu í framhaldinu.