Seyðfirðingar þurfa að moka sig út úr húsum

„Það hefur snjóað mjög mikið þótt það hafi dregið heldur úr síðustu tímana. Síðan er víst von á öðru skoti síðar í dag,“ segir Inga Þorvaldsdóttir, fulltrúi sveitarstjóra Múlaþings á Seyðisfirði.

„Ég bý efst í þorpinu og sé að hjá nágranna mínum er snjór upp á hálfa hurð. Hann kemst ekki út nema moka sig út. Bílar eru á kafi.

Það var talsverður vindur með úrkomunni og hefur fokið í stóra skafla sums staðar. Ég æði víða snjóinn upp í klof á götunni,“ bætir hún við.

Verið er að reyna að moka aðalgötur á Seyðisfirði og eru fimm moksturstæki komin af stað. Þar voru sjö svæði, yst í byggðarlaginu sitt hvoru megin, rýmd vegna snjóflóðahættu í gærkvöldi. Varðskipið Freyja kom þangað snemma í morgun og lúrir úti á firðinum. Samkvæmt tölum Veðurstofunnar er úrkoma á Seyðisfirði, frá því að í veðrið gekk í gær, kominn í yfir 80 millimetra.

Myndir sem Daniela Webrová tók á Seyðisfirði um klukkan 4:30 í nótt. Myndir sem sýna ástandið og nánari lýsingar má senda á This email address is being protected from spambots. You need JavaScript enabled to view it.