Sjötíu milljónir austur úr Fiskeldissjóði
Tvö verkefni á Austurlandi fengu styrki upp á samanlagt sjötíu milljónir króna þegar úthlutað var í fyrsta sinn úr fiskeldissjóði.Sjóðurinn er á forræði Atvinnuvegaráðuneytisins en fiskeldisfyrirtæki greiða í hann ákveðna upphæð af hverju kílógrammi af slátruðum laxi, sem alinn er í sjókvíum.
Fé úr sjóðnum er ætlað til sveitarfélaga í verkefni sem byggja upp innviði og þjónustu þar sem fiskeldi í sjókvíum er stundað.
Að þessu sinni fengust tæpar 42,6 milljónir króna í stækkun leikskólans á Eskifirði og rétt rúmar 28 milljónir í uppbyggingu fráveitu á Djúpavogi. Að auki var sótt um fyrir skipulagi við Gleðivík á Djúpavogi en því hafnaði, að því er fram kemur í frétt Bæjarsins besta.
Í tilkynningu frá Löxum fiskeldi er haft eftir Jens Garðari Helgasyni, forstjóra, að ánægjulegt sé að sjóðurinn hafi valið þessi tvö verkefni. Hann býst við að úthlutanir úr sjóðnum hækki á næstu árum samhliða auknu fiskeldi.
Þá fengu þrjú verkefni á Vestfjörðum úthlutað um 34 milljónum.