Spurningakeppni fermingarbarna á Austurlandi
Á morgun fara fram úrslit í spurningakeppni fermingarbarna á
Austurlandi. Keppt verður í Reyðarfjarðarkirkju en þetta er í fyrsta
sinn sem keppnin er haldin.
Úrslitakeppnin hefst með fjölskylduguðsþjónustu kl. 14:00 í Reyðarfjarðarkirkju, þar sem keppendur liðanna taka virkan þátt, lesa ritningarlesta og flytja bænir. Undanúrslit og úrslit fara svo fram í safnaðarheimilinu eftir guðsþjónustuna.
Spurningarkeppnin hófst á haustmánuðum með undankeppni þar sem 14 lið tóku þátt af öllu Austurlandi. Í undanriðlum var keppnin oft hnífjöfn og spennandi og munurinn í lokin oft aðeins eitt stig. Þau lið sem hafa unnið sér keppnisrétt í úrslitunum eru frá Egilstöðum, Vopnafirði, Reyðarfirði og sameiginlegt lið frá Breiðdalsvík og Stöðvarfirði. Spurningar keppninnar eru almenns eðlis, en einnig úr fræðsluefni fermingarbarnanna og Biblíunni.
Keppnin er haldin á vegum Prestafélags Austurlands og er liður í fermingarstarfi kirkjunnar á Austurlandi. Árlega eru haldnar fermingarbúðir í Kirkjumiðstöðinni á Eiðum. Fermingarbörnin taka þátt í fermingarbarnasöfnun Hjálparstarfs kirkjunnar og fá heimsókn frá Afríku. Þá er foreldrum og börnum boðið upp á fjölbreytta fræðslu, svo sem um trúarstef í kvikmyndum og samskipti foreldra og unglinga.
Dómari keppninnar er Stefán Bogi Sveinsson. Öllum er velkomið að fylgjast með keppninni.
