Stefna að frekari afléttingu þegar varnargarðar verða klárir
Vonast er til að hægt verði að aflétta rýmingu á svæðinu milli kvísla stóru skriðunnar sem féll á Seyðisfjörð í desember þegar búið verður að reisa bráðabirgðavarnir fyrir svæðið. Flýta á hættumati vegna húsa sem standa við Stöðvarlæk.Frá því um áramót hefur verið unnið að hreinsun á Seyðisfirði eftir skriðuföllin þar í desember. Mest vinna hefur verið þar sem stóra skriðan féll 18. desember. Stórvirkar vinnuvélar eru þar á ferðinni við hreinsun og gerð varna.
Verið er að gera varnargarð við húsin sem standa næst Búðaránni og sluppu þegar gamall skriðuhryggur, sem kallast Múli, tvístraði skriðunni. Á þeirri torfu standa húsin við Hafnargötu 10, 11, 12, 14, 15, 16b og 18c.
Í tilkynningu frá almannavarnadeild ríkislögreglustjóra og lögreglunni á Austurlandi segir að svæðið í kringum þessi hús teljist vinnusvæði og óviðkomandi sé þar bannaður aðgangur. Þar kemur fram að ákveðið hafi verið að aflétta ekki rýmingu húsanna á meðan verið sé að gera varnir þar.
„Allt sem varðar rýmingar er í stöðugri endurskoðun. Vinna við varnargarð er í fullum gangi og gengur vel. Þegar búið er að taka hann út og meta stöðugan til virkni mega íbúar eiga von á að rýmingu á þessu svæði verði aflétt,“ segir Kristján Ólafur Guðnason, yfirlögregluþjónn í samtali við Austurfrétt.
Í tilkynningunni kemur einnig fram að Múlaþing, ásamt fulltrúa ofanflóðasjóðs, hafi lagt til að hættumati verið flýtt á svæði utan við stóru skriðuna vegna húsa sem eru sitt hvoru megin við Stöðvarlæk. Óvissa ríkir um framtíð íbúabyggðar þar en sprunga gengur frá sári stóru skriðunnar út í lækinn.
Vegna alls þessa hefur verið ákveðið að að aflétta ekki hættustigi á Seyðisfirði meðan hreinsunarstarf er í fullum gangi, unnið að vörnum og beðið eftir frummatsskýrslunni.
Veðurstofan telur ekki yfirvofandi skriðuhættu meðan kalt er í veðri og þurrt. Seyðfirðingar mega hins vegar vænta þess næstu mánuði að rýmt verði í öryggisskyni ef veðurspá er óhagstæð, líkt og gert var um helgina. Unnin hafa verið drög að reitaskiptri rýmingaráætlun til þess að bregðast við slíkum aðstæðum. Í tilkynningunni segir að áætlunin verði unnin í samráði við íbúa Seyðisfjarðar og kynnt þegar hún verður tilbúin.