Stefnir í nokkra fækkun á einbreiðum brúm á Austurlandi
Gangi markmið samgönguáætlunar fyrir árabilið 2020 til 2024 eftir mun einbreiðum brúm á Austurlandi fækka um sex, þar af eru fjórar á hringveginum. Yfir helmingur allra brúa í þjóðvegakerfinu eru einbreiðar.Þetta kemur fram í svari Sigurðar Inga Jóhannsson samgönguráðherra á alþingi við fyrirspurn frá Maríu Hjálmarsdóttur Samfylkingunni.
Í svarinu segir að af 1.191 brú í þjóðvegakerfinu eru 677 einbreiðar, þar af voru 39 brýr á Hringveginum einbreiðar árið 2017. Í markmiðum samgönguáætlunar 2019–2023 var áherslan á að fækka einbreiðum brúm á vegum með yfir 200 bíla meðalumferð á dag allt árið og fækka þeim um níu á tímabilinu eða í 30 árið 2023.
Brýrnar á Austurlandi sem eru á fyrrgreindri áætlun eru við Selá í Álftafirði, Hvaldalsá, Gjádalsá, Búlandsá, Krossá á Berufjarðarströnd og Gilsá á Völlum.
.
Í svarinu segir einnig að í samgönguáætlun sé gert ráð fyrir 2.5 milljarða. kr. framlagi á næstu fimm árum til fækkunar einbreiðra brúa með markmiði að einbreiðar brýr á Hringvegi verði 22 árið 2024.
Þessu til viðbótar þá er gert ráð fyrir sérstöku framlagi í tengslum við fjárfestingarátak 2020 að fjárhæð 3.3 milljarða kr. til að breikka einbreiðar brýr á næstu tveimur árum. Samtals er því áformað að verja um 5.8 milljörðum kr. á næstu fimm árum til fækkunar á einbreiðum brúm.
