Takmarka samkomur við 200 manns
Katrín Jakobsdóttir forsætisráðherra sagði rétt í þessu í viðtali á ruv að frá og með miðnætti annað kvöld munu 200 manna samkomutakmarkanir gilda. Þetta þýðir útihátíðin Bræðslan á Borgarfirði eystra sleppur fyrir horn en Franskir dagar á Fáskrúðsfirði eru í uppnámi.
Þær hertu reglur sem kynntar voru eftir ríkisstjórnarfundinn á Hótel Valaskjálf fela m.a. í sér að veitingastaðir þurfa að loka fyrir áfengissölu kl. 23 að kvöldi og að eins meters nálægðarregla er tekin upp að nýju. Katrín sagði einnig að hertar reglur taki gildi á miðnætti annað kvöld og eigi að gilda til 13. ágúst.
Á ruv.is kemur fram að tónlistarmaðurinn Jónas Sigurðsson kemur ekki fram á tónleikum í félagsheimilinu Fjarðarborg á Borgarfirði eystra í kvöld eins og til stóð. Jónas er í sóttkví ásamt öðrum liðsmönnum hljómsveitar hans. Tónleikarnir eru hliðarverkefni Bræðslunnar sem verður á Borgarfirði eystra annað kvöld.