Þungt yfir næstu daga
Veðursældin hefur verið einstök á Austurlandi síðastliðinn mánuð og hitatölur margsinnis farið fyrir 20 gráður.
Sólin virðist nú ætla að færa sig um set því spáð er góðu veðri og töluverðum hita á höfuðborgarsvæðinu í vikunni en þungviðri á Austurlandi.
Í dag hefur verið nokkuð úrkomumikið á Austurlandi og skýjað en á morgun mun draga úr úrkomu og gæti jafnvel stytt upp víða, en búast má við súld eftir hádegi. Þá mun hvessa nokkuð á morgun, 8-13 m/s norðan- og norðvestanátt.
Búast má við dálítilli vætu á fimmtudaginn en stytta á upp síðdegis, hlýjast á Austurlandi verður sunnan Fáskrúðsfjarðar.
Um helgina verður norðan eða breytileg átt, hægviðri og bjart með köflum. Hlýjast verður sunnan og vestan til á landinu en gera má ráð fyrir nokkrum hlýindum á Austurlandi á föstudag og laugardag.
Myndin sýnir hitaspá fimmtudagsins. Sjá má að hitinn verður mestur á Suðvesturhorninu.
