Umferðin á Austurlandi jókst um rúm 26% í mars
Umferðin um Hringveginn á Austurlandi jókst um rúm 26% í mars miðað við sama mánuð í fyrra. Ef tekið er tímabilið frá áramótum er aukningin hinsvegar aðeins rúm 3% miðað við sama tímabil í fyrra.Þetta kemur fram á vefsíðu Vegagerðarinnar. Þar segir að umferðin á Hringveginum í heild í mars jókst um nærri 23% frá mars í fyrra en þá hafði kórónufaraldurinn dregið mjög mikið úr umferð.
Frá áramótum hefur umferðin aukist um 7% og er aukning í öllum landssvæðum utan Suðurlands þar sem umferð dregst saman. Má það væntanlega rekja til samdráttarins í ferðamennskunni, að því er segir á vefsíðunni.
Umferð jókst í öllum landssvæðum í mars en mest á Norðurlandi eða um 34,6% en minnst á Suðurlandi eða um 16,8%.
Athygli vekur að allir talningastaðir, fyrir utan tvo, sýna mikla aukningu. Mest jókst umferðin um Holtavörðuheiði eða um 46,3%. Þeir staðir sem sýna samdrátt eru Mýrdalssandur með tæplega 49% samdrátt og vestan Hvolsvallar með rétt rúmlega 5% samdrátt. Umferðin um Mýrdalssand, var í síðasta mánuði, rétt rúmlega það sem hún var árið 2013.