Vilja skoða möguleikann á gjaldtöku af alvöru
Fulltrúar í bæjarstjórn Seyðisfjarðar eru tilbúnir að skoða af fullri alvöru að innheimta veggjöld í Fjarðarheiðargöng verði það til þess að flýta fyrir framkvæmdum. Formaður bæjarráðs segir tíðindi í síðustu viku skapa vendipunkt í gangabaráttunni.„Bæjarstjórn hefur áður sagt að Seyðfirðingar sjái ekkert að því að borga einhver veggjöld ef það flýtir fyrir framkvæmdum. Til þess þarf pólitíska ákvörðun, það hefur ekki verið gjaldtaka í göngum þegar aðeins hefur verið val um eina leið, eins og er til Seyðisfjarðar yfir vetrartímann,“ segir Elfa Hlín Pétursdóttir, formaður bæjarráðs Seyðisfjarðarkaupstaðar í samtali við vikublaðið Austurgluggann.
Tvennt hefur skapað aukna umræðu um gjaldtöku í göngin. Annars vegar ný 15 ára samgönguáætlun sem gerir ekki ráð fyrir Fjarðarheiðargöngum fyrr en á árunum 2029-2033 og því fyrirsjáanlegt tíu ára hlé á jarðgangaframkvæmdum á landinu. Hins vegar funduðu bæjarfulltrúarnir með fulltrúum tveggja jarðganga í Færeyjum.
Meiri umferðaraukning en reiknað var með
Fulltrúar Vága- og Norðoyajarðganganna voru hérlendis í nýverið og heimsóttu meðal annars Vaðlaheiðargöng og Norðfjarðargöng. Vágagöngin voru opnuð 2002 en Norðoyagöngin 2006.
Bæði göngin eru í sérstöku félagi sem er að fullu í eigu færeyska ríkisins. Það lagði til helming stofnkostnaðar en hinn helmingur var fjármagnaður með láni á lágum vöxtum úr sérstökum innviðasjóði með tryggingu í göngunum sjálfum.
Bæði göngin liggja undir sjó. Þurftu þeir sem vildu komast á milli áður að borga fyrir far með ferju og greiðsluvilji þannig var til staðar.
Að sögn Elfu kom það fram á fundinum að búið væri að borga bæði göngin upp og hefði umferð um þau reynst mun meiri en reiknað var með. Í dag hafa veggjöldin lækkað og eru nýtt til viðhalds á göngunum.
Til í samtalið
Fulltrúar Seyðisfjarðar nýttu tækifærið í kjördæmaviku Alþingis í síðustu viku til að kynna fyrirkomulagið fyrir þingmönnum kjördæmisins. Elfa segir að hugmyndum Seyðfirðinga hafi ekki verið illa tekið þótt þær þýði mikla stefnubreytingu.
„Við teljum kominn tíma á að setja meiri þunga í að skoða möguleikann á gjaldtöku. Það vekur hins vegar upp margar spurningar, meðal annars hvers vegna rukkað yrði í Fjarðarheiðargöng en ekki önnur jarðgöng. Þetta þýðir líka aðra hugsun um framkvæmdir á Íslandi. Við erum hins vegar til í þetta samtal og erum farin að leggja drög að því.“
