Von um að Fjarðarheiði og Fagridalur opnist fljótlega
Fréttir • This email address is being protected from spambots. You need JavaScript enabled to view it. • Fyrst birt 20. jan 2025 11:38 • Uppfært 20. jan 2025 11:38
Vegagerðin leggur kapp á að opna leiðirnar yfir Fagradal og Fjarðarheiði. Sjúkraflutningur bíður eftir að komast frá Seyðisfirði til Neskaupstaðar. Ekki er útlit fyrir að vegurinn yfir Vatnsskarð til Borgarfjarðar opni í dag.
Samkvæmt upplýsingum frá Vegagerðinni um klukkan 11:15 í morgun var farið að styttast í að vegurinn yfir Fjarðarheiði myndi opnast. Þar hafa verið erfið skilyrði, mjög þungur snjór.
Á Fagradal er einnig verið að moka og stutt í opnun. Óvissustigi vegna snjóflóðahættu þar var aflýst klukkan 11:30 en veginum var lokað um kvöldmat í gær.
Sjúkrabíll bíður á Seyðisfirði eftir að leiðirnar opnist til að ferja manneskju á Umdæmissjúkrahús Austurlands í Neskaupstað.
Búið er að opna veginn frá Norðfirði inn Fannardal. Beðið var með mokstur í morgun þar til sást til fjalla til að tryggja að ekki væri snjóflóðahætta.
Búið er opna frá Reyðarfirði suður til Hornafjarðar. Á einhverjum stöðum er einbeitt. Stórt snjóflóð féll í Færivallaskriðum milli Breiðdalsvíkur og Stöðvarfjarðar seinni partinn í gær. Í Berufirði liggur rafmagnslína niðri þannig varasamt er fyrir stóra bíla að fara um.
Á Fljótsdalshéraði eru helstu leiðir færar að minnsta kosti jeppum. Þar sem skefur hefur dregið í skafla en rutt var víðast hvar í morgun. Ekki er útlit fyrir að hægt verði að opna yfir Vatnsskarð til Borgarfjarðar í dag.
Búið er að moka frá Mývatni að Möðrudal og verið að skoða ástand vegarins upp úr Jökuldal. Gert er ráð fyrir að fara í mokstur þar um og yfir Vopnafjarðarheiði fljótlega.
Mynd úr safni.
