Vonbrigði með vinnuskólann á Djúpavogi
Heimastjórn Djúpavogs lýsir yfir vonbrigðum með breytingar á fyrirkomulagi vinnskóla á Djúpavogi á komandi sumri. Breytingar fela í sér nokkra skerðingu á vinnutíma miðað við fyrirkomulagið í fyrra.“Einnig vantar atvinnutækifæri fyrir ungmenni á framhaldskólaladri en fyrir því er rík hefð í byggðarlaginu að þessum hópi standi til boða vinna fyrir sveitarfélagið,” segir í bókun á fundi heimastjórnar í gærdag.
Þá hefur heimastjórn af því áhyggjur að þessi skerðing á vinnutíma komi niður á ásýnd og umhverfi bæjarinns og muni jafnvel auka kostnað sveitarfélagsins vegna aðkeyptrar vinnu.
“Heimastjórn skorar á umhverfissvið að endurskoða þessar breytingar, sérstaklega vegna atvinnuástands í kjölfar covid faraldursins,” segir ennfremur.
Umhverfis- og framkvæmdaráð Múlaþing samþykkti í síðasta mánuði tillögu um fyrirkomulag vinnuskóla sveitarfélagsins árið 2021, laun og vinnutímafjölda þeirra aldurshópa sem boðið verður að sækja um í vinnuskóla. Helsta breytingin er að vinnuvikan var stytt úr fimm dögum í fjóra.
Laun miðað við hlutfall af launaflokki 117 í kjarasamningi FOSA verða sem hér segir:
Árgangur 2008 - 30%, 668 kr./klst. Vinnutími 3 klst á dag, 4 daga vikunnar í u.þ.b. 6 vikur.
Árgangur 2007 - 45%, 1.002 kr./klst. Vinnutími 3 klst á dag, 4 daga vikunnar í u.þ.b. 7 vikur.
Árgangur 2006 - 55%, 1.225 kr./klst. Vinnutími 6 klst á dag, 4 daga vikunnar í u.þ.b. 10 vikur.
Árgangur 2005 - 65%, 1.447 kr./klst. Vinnutími 6 klst á dag, 4 daga vikunnar í u.þ.b. 10 vikur
