Yfir 70 nemar í Sjávarútvegsskóla unga fólksins
Níunda ári Sjávarútvegsskóla unga fólksins á Austurlandi er nú lokið. Nemendur sem sóttu skólann voru samtals 71 og höfðu þeir lokið 8. bekk grunnskóla.
Í tilkynningu segir að kennsla fór fram á Neskaupstað, Eskifirði, Vopnafirði, Fáskrúðsfirði og Seyðisfirði Verkefnið var unnið í samstarfi vinnuskóla byggðarlaga, Sjávarútvegsmiðstöðvar Háskólans á Akureyri og fyrirtækja í sjávarútvegi og eða tengdum greinum.
Námið er í formi fyrirlestra og heimsókna til fyrirtækja en farið var í fiskvinnslur, fiskimjölsverksmiðju, netaverkstæði og um borð í skip svo dæmi séu tekinn. Þá var dagskráin einnig brotinn upp með spilum og keppnum auk verklegra æfinga s.s. skynmat á fiski og tegundagreiningu,“ segir í tilkynningunni.
„Tveir gestafyrirlesarar þær; Arnfríður Eide Hafþórsdóttir og Fanney Friðriksdóttir komu í heimsókn. Björgunarsveitirnar og fiskeldisfyrirtæki sáu um að bjóða upp á skemmtilega dagskrá fyrir nemendur lokadaginn og endað var síðan á pizzaveislu og útskrift.“
Kennarar á Austurlandi voru þrír nemar í sjávarútvegsfræði við Háskólann á Akureyri; þau Særún Anna Brynjarsdóttir, Þorvaldur Marteinn Jónsson og Friðbjörg María Björnsdóttir.
Aðalstyrktaraðilar á Austurlandi voru Síldarvinnslan hf., Eskja hf., Brim hf, og Loðnuvinnslan hf. Aðrir styrktaraðilar voru: Hafnarsjóður Fjarðabyggðar, Vopnafjarðarhreppur og Múlaþing.
Fiskeldisskóli unga fólksins
Einnig kemur fram að í fyrsta sinn í sumar var Fiskeldisskóli unga fólksins kenndur í Vesturbyggð og á Djúpavogi en hann byggir á svipuðu fyrirkomulagi og Sjávarútvegsskóli unga fólksins og er liður í samstarfsverkefni Íslands, Noregs, Svíþjóðar og Finnlands um nám í fiskeldi. Samtals sóttu 22 nemendur skólann.
Fiskeldisskólinn unga fólksins var kenndur á Djúpavogi vikuna 18-23 júlí. Styrktaraðilar Fiskeldisskóla unga fólksins á Djúpavogi voru; Fiskeldi Austfjarða ehf., Múlaþing, Egersund ehf og Laxar hf. Kennarar voru; Magnús Víðisson, Þorvaldur Marteinn Jónsson og gestafyrirlesari; Freysteinn Nonni Mánason.