Rithöfundalestin 2020: Silfurberg eftir Kristján Leósson og Leó Kristjánsson
Bókin Silfurberg – íslenski kristallinn sem breytti heiminum eftir feðgana Leó Kristjánsson og Kristján Leósson fjallar um silfurbergið sem numið var á Helgustöðum í Reyðarfirði og áhrif þess á heimssöguna.Það er Kristján sem lauk við bókina en faðir hans Leó lést í sumar. Hann hafði þá eytt 25 árum í að rannsaka afdrif silfurbergsins frá Helgustöðum.
„Margir Austfirðingar þekkja námuna en færri vita hve mikil áhrif hún hafði á þróun vísinda og tækni í Evrópu frá því um 1670 og fram yfir aldamótin 1900,“ segir Kristján um bókina.
Rithöfundalestin hefur verið árviss viðburður á Austurlandi þar sem landsþekktir rithöfundar, í bland við austfirska höfunda, hafa lesið upp úr nýútkomnum verkum sínum. Rithöfundalestin 2020 er samstarfsverkefni Gunnarsstofnunar á Skriðuklaustri, menningarmálanefndar Vopnafjarðarhrepps, Skaftfells menningarmiðstöðvar á Seyðisfirði, Menningarstofu Fjarðabyggðar, menningarmálanefndar Djúpavogs og Austurfréttar/Austurgluggans.