Útivistartími tekur breytingum
Útivistartími barna og unglinga tók breytingum í gær, 1. maí. Frá þeim tíma mega börn 12 ára og yngri vera úti til klukkan 22 og unglingar 13 til 16 ára mega vera úti til miðnættis. Börn mega ekki vera á almannafæri utan fyrrgreinds tíma nema í fylgd með fullorðnum. Þetta kemur fram í tilkynningu frá lögreglunni.
Útivistarreglurnar eru samkvæmt barnaverndarlögum. Þeim er meðal annars ætlað að tryggja nægan svefn. Þó svo svefnþörfin sé einstaklingsbundin má ætla að börn og unglingar á grunnskólaaldri þurfi tíu tíma svefn á nóttu.
Bregða má út af reglunum fyrir eldri hópinn þegar unglingar eru á heimleið frá viðurkenndri skóla-, íþrótta- eða æskulýðssamkomu. Aldur miðast við fæðingarár.
